Home Mchanganyiko ALIYEKUWA MTUMISHI WA MPANDA KURUDISHWA KUJIBU HOJA

ALIYEKUWA MTUMISHI WA MPANDA KURUDISHWA KUJIBU HOJA

0

Baadhi ya Madiwani wa Halmashauri ya manispaa ya mpanda wakiwa katika kikao

 Meya wa Manispaa ya Mpanda William Mbogo kushoto akiwa amekaa na Mkuu wa Mkoa wa Katavi Juma Homera 

………………………………………

Mkuu wa mkoa wa Katavi bwana Juma Homera ametoa agizo la kurudishwa kwa mtumishi mmoja aliyekuwa Afisa Ardhi katika Halmashauri ya Mji wa Mpanda bwana Peter Mkalipa; baada ya kuisababishiaa hasara ya shilingi milioni 36

Kwa sasa mtumishi huyo amehamishiwa wilaya ya Sengerema; ambapo inadaiwa kuwa akiwa Mpanda aligawa viwanja vya Halmashauri vilivyopimwa ambapo kiwanja kimoja aligawa kwa zaidi ya mtu mmoja hali iliyosababisha migogoro ya ardhi

Bwana Homera ametoa agizo hilo baada ya kupokea taarifa katika baraza la hoja la Madiwani wa Manispaa ya Mpanda  

 Amesema mtumishi huyo alifanya hivyo kwa makusudi hivyo anawajibika kuja kujibu hoja hivyo amelitaka baraza la madiwani kumuandikia barua ya kumuita

 Kwa upande wake Meya wa Manispaa wa Manispaa ya Mpanda bwana William Mbogo amekiri kuwepo kwa migogoro ya ardhi kutokana na watu kugonganishwa katika kiwanja kimoja

Hata hivyo ametoa tahadhari kwa watumishi kutokuzoea tabia hiyo ambayo ameiita ya makusudi na inaweza kuepukika

Bwana Michael Nzyungu Mkurugenzi wa Halmashauri ya Manispaa ya Mpanda  amesema Manispaa hiyo ilikuwa inakabiliwa na matatizo makubwa ya migogoro ya ardhi lakini kwa kushirikiana na viongozi mbalimbali wanaendelea kuyatatua

 Ameongeza kuwa ratiba za Mkuu wa Wilaya ya Mpanda na Mkuu wa mkoa wa Katavi za kusikiliza kero za wananchi zinasaidia kwa kiasi kikubwa kutatua kero za wananchi

Awali katika kikao hicho Mkaguzi wa nje wa hesabu za serikali bwana Mohamed Msangi amesema kwa mwaka 2017/2018 halmashauri ya Manispaa ya Mpanda imepata hati safi           

Bwana msangi ameongeza kuwa kati ya hoja 125 zilizowasilishwa; hoja 76 zina majibu ya kuridhisha na zimefungwa na hoja 49 zimeendelea kusalia