……………………………………………………………………
Na Masanja Mabula,Pemba.
WANAVIKUNDI vya ujasiriamali Wilaya ya Micheweni Mkoa wa Kaskazini Pemba wamekishukuru Chama Cha Waandishi wa Habari Wanawake TAMWA Zanzibar kwa juhudi zake za kuwawezesha wanawake kujiinua kiuchumi kupitia vikundi hivyo.
Wakizungumza na Mwandishi wa habari hizi wamesema kupitia vikundi hivyo vinavyosimamiwa na TAMWA Zanzibar kupitia mradi wa kuwawezesha Wanawake kiuchumi, vimewasaidia kuongeza mashirikiano katika shughuli za uzalishaji na kuongeza hamasa kwa wanawake wengine katika jamii.
Bijuma Hamis Kombo mwanachama wa kikundi cha Safinia kilichopo Shehia ya Majenzi Micheweni amesema vikundi hivyo vimekuwa ni mkombozi kwa wanawake wengi kutokana wengi wao huvitumia kama sehemu ya kujikwamua kiuchumi.
“Vikundi hivi vimetusaidia kupata sehemu ya kujikwamua kiuchumi kwani kupitia Hisa tunazoziweka, mwanachama anaweza kukopa kwenye kikundi na kuendeleza shughuli zake mwenyewe,” alisema Bijuma.
Aidha amesema kupitia vikundi hivyo vimemsaidia kuongeza kipato kwa familia yake kupitia mikopo hiyo.
“Mwanzo kabisa nilikopa Shilingi laki Moja, nikapasisha leseni ya pikipiki yangu (boda boda) ili kupata pesa za kuweka hisa na nashukuru Mungu saizi naendelea na biashara yangu na Hisa naendelea kuweka bila shida yoyote,” alisema.
Nae Asha Moh’d Said kwa upande wake amesema kupitia vikundi hivyo vimemuwezesha kuongeza mtaji wa shughuli zake za ufumaji na ushonaji ikiwa ni sambamba na kuongeza soko lake zaidi.
“Mimi nilikopa Shilingi Laki Tatu kwenye kikundi changu nikaongezea mtaji wa biashara ya Vitambaa na Mashuka. Tunashukuru sana vikundi vimetusaidia sisi Wanawake kukwamuana sisi kwa sisi,” alisema Asha.
Kwa upande wake Ramla Suleiman Khamis kutoka kikundi cha Tuko Pamoja, amesema licha ya mafanikio hayo lakini vikundi hivyo vinakabiliwa na tatizo la ukosefu wa soko la uhakika wa bidhaa zao jambo linalochelewesha kasi ya maendeleo yao.
“Tunashukuru sana TAMWA Zanzibar wametusaidia, sasa umasikini unapungua taratibu kwetu lakini changamoto yetu kubwa ni Masoko. Tunazalisha Sabuni, Mafuta na kushona Mashuka lakini sehemu ya kuuza ni kikwazo kikubwa jambo linalopelekea wengine kutaka kukata tamaa,” alisema.
Aidha wameomba kupatiwa msaada wa utaftaji wa Masoko ili kuwawezesha Bidhaa zao kuuzika na kuendelea kuzalisha kwa wingi kwa lengo la kuwainua wanawake kiuchumi.
Afisa Mradi wa kuwawezesha Wanawake Kiuchumi TAMWA Zanzibar Ofisi ya Pemba, Asha Mussa Omar amesema chama hicho kinaendelea kufanyia kazi changamoto zinazowakabili wanavikundi hao ili lengo la kuwainua kiuchumi liweze kukamilika.
“Tusikatishwe tamaa na changamoto zinazotukabili katika vikundi vyetu kwani changamoto ya upatikanaji wa Soko tunaendelea kulitatua. Lengo la TAMWA Zanzibar ni kuhakikisha Wanawake wanaondokana na umasikini kupitia shughuli zetu hizi za vikundi,” alisema Asha.
