******************
Na Mwandishi wetu, Mirerani
MWANAFUNZI wa darasa la sita wa shule ya awali na msingi New Light ya Mji mdogo wa Mirerani Wilayani Simanjiro Mkoani Manyara, Andrew Joseph Lyimo, amenyakua taji la Mr Mazubu 2023.
Andrew Lyimo ameshinda ubingwa huo baada ya kuwabwaga vijana wenzake katika michuano hiyo iliyoshirikisha wavulana watano watanashati wa mji mdogo wa Mirerani.
Mshindi huyo alitangazwa kushinda nafasi hiyo na jaji mkuu wa mashindano hayo Jema Lilama (Kichuna wa Kimakonde) baada ya kuonyesha vazi la ubunifu na vazi la kutokea.
Mwenyekiti wa Mamlaka ya Mji mdogo wa Mirerani, Adam Kobelo alimkabidhi Mr Mazubu 2023 Andrew Lyimo, zawadi ya kitita cha shilingi taslimu 250,000.
Pia, Kobelo alimpatia mshindi huyo zawadi ya fulana yenye nembo ya Mazubu Grand Hotel na daftari kubwa la kuandikia somo moja atakaloamua kuandikia.
Kwa upande wa Miss Mazubu 2023, Kobelo alimpatia mshindi wa taji hilo Precious Mark Massawe kiasi cha fedha taslimu shilingi 250,000.
Pia, Precious Massawe alipatiwa zawadi ya fulana yenye nembo ya Mazubu Grand Hotel na daftari kubwa la kuandikia somo moja atakaloamua kuandikia.
