Rais wa Jamhuri ya Muungano wa Tanzania Mhe. Samia Suluhu Hassan, akihutubia Wananchi wa Longido mkutano wa Hadhara uliofanyika leo tarehe 18 Oktoba 2021 katika Uwanja wa Stendi mpya Longido Mkoani Arusha. Mhe. Rais Samia yupo Mkoani Arusha akiendelea na ziara yake ya kikazi kutembelea, kukagua na kuzindua miradi mbalimbali ya maendeleo ya Wananchi Mkoani Arusha. PICHA NA IKULU.
……………………………………………………
Na Ahmed Sagaff – MAELEZO
Rais Samia Suluhu Hassan amewataka watendaji wa Serikali kuweka utaratibu wa kufuatilia kero zinazowakabili wawekezaji na kuzitatua.
Mhe. Rais ametoa agizo hilo leo alipokuwa katika ziara ya kikazi katika Wilaya ya Longido, Mkoa wa Arusha.
“Tunavuta wawekezaji wanakuja lakini wakifika na wakishajenga viwanda, tusiwaache wenyewe, tufuatilie na tujue kero zinazowakabili na tuzitatue,” ameagiza Rais Samia.
Tangu alipoingia madarakani Machi 19, 2021 Rais Samia amekuwa akichukuwa jitihada mbalimbali za kuwavutia wawekezaji na kuhakikisha wale waliopo wanaendesha shughuli zao kwa kufuata sheria bila kubughudhiwa.
