Waziri wa Nchi Ofisi ya Waziri Mkuu, Mhe. Geoffrey Mwambe akiongea na Waandishi wa Habari juu ya umuhimu wa makubaliano ya Ushirikiano na wafanyabiashara kutoka nchini Misri kupitia Jumuiya ya Muungano Kimataifa chini ya kundi la Afrika na Asia (Afro-Asian Union (AFASU) yaliyoingiwa na Serikali ya Tanzania kupitia Ofisi ya Waziri Mkuu – Uwekezaji leo tarehe 12 Oktoba, 2021
Jumuiya ya Muungano Kimataifa chini ya kundi la Afrika na Asia (Afro-Asian Union (AFASU) wakisaini makubaliano ya Ushirikiano wa Tanzania na Jumuhiya ya wafanyabiashara kutoka nchini Misri . Makubaliano hayo yanalenga kuhamasisha na kuendeleza masuala ya biashara, uwekezaji na Utalii katika sekta za Kilimo, Viwanda, Biashara mtandao, Utalii, Elimu na TEHAMA, leo tarehe 12 Oktoba, 2021
Baadhi ya maafisa wa serikali kutoka Ubalozi wa Tanzania nchini Misri, Wizara ya mambo ya nje na Ushirikiano wa Afrika Mashariki pamoja na Mkurugenzi Mamlaka ya Maendeleo ya Biashara Tanzania (TanTrade), wakifuatailia utiaji Saini wa makubaliano ya Ushirikiano na wafanyabiashara kutoka nchini Misri kupitia Jumuiya ya Muungano Kimataifa chini ya kundi la Afrika na Asia (Afro-Asian Union (AFASU) yaliyoingiwa na Serikali ya Tanzania kupitia Ofisi ya Waziri Mkuu – Uwekezaji, leo tarehe 12 Oktoba, 2021 
Waziri wa Nchi Ofisi ya Waziri Mkuu, Mhe. Geoffrey Mwambe, na Rais wa Dkt.Hossam Darwish wa Jumuiya ya Muungano Kimataifa chini ya kundi la Afrika na Asia (Afro-Asian Union (AFASU) wakiwa na watendaji kutoka Mamlaka ya Maendeleo ya Biashara Tanzania (TanTrade) na Kituo cha Uwekezaji Tanzania, baada ya kuingia makubaliano ya Ushirikiano na Jumuiya ya wafanyabiashara ya AFASU, yaliyoingiwa na Serikali ya Tanzania kupitia Ofisi ya Waziri Mkuu – Uwekezaji, kwa ajili ya kuendeleza na kuhamasihsa uwekezaji nchini, leo tarehe 12 Oktoba, 2021.
*******************************
Na. Beatrice Sanga – MAELEZO
Waziri wa Nchi Ofisi ya Waziri Mkuu, Mhe. Geoffrey Mwambe Pamoja na Raisi wa Jumuiya ya Muungano Kimataifa chini ya kundi la Afrika na Asia (Afro- Asian union (AFASU) Dr. Hossam Darwish wametia saini hati ya makubaliano ya kujumuika, kukuza na kuunda ushirikiano katika sekta ya uwekezaji (MoU) wenye lengo la kuwezesha na kukuza uwekezaji, biashara na utalii nchini Tanzania .
Akizungumza katika hafla ya utiaji saini makubaliano hayo iliyofanyika katika Ofisi Ndogo ya Waziri Mkuu Jijini Dar es salaam, Mhe. Mwambe ameainisha maeneo ambayo Tanzania na ASAFU watashirikiana katika kuvutia maeneo ya uwekezaji kuwa ni pamoja na uwekezaji katika kilimo, Viwanda, Biashara ya Kielektroniki, Utalii, elimu pamoja na Uwekezaji katika ICT na uanzishaji wa elektroniki.
Mhe. Mwambe ameeleza kuwa kusainiwa kwa hati ya makubaliano kunaonyesha dhamira kubwa ya serikali ya awamu ya sita ya kushirikiana na wadau wote duniani na kuwaalika katika uwekezaji lakini pia kutumia fursa ya kuaminika kama serikali ya Tanzania kuweza kuwaomba Taasisi na sekta binafsi waweze kutusemea ili kushawishiana kuja kuwekeza Tanzania kwasababu ya mazingira bora ya uwekezaji yaliyowekwa nchini.
“Serikali ya awamu ya sita inaaminika na mazingira ya uwekezaji Tanzania yameendelea kuboreshwa na pia sisi kwenye Nyanja za kimataifa tafsiri yake ni kuwa tanzania inaendelea kusifika kwenye ubora wake wa mazingira ya uwekezaji”Amesema Mhe. Mwambe
Aidha Mwambe amewashukuru wawekezaji hao na kuwahakikishia kuwa ofisi yake iko tayari kushirikiana nao kwa kuweka mazingira wezeshi ili kuhakikisha wanafanikiwa, na kuwataka watanzania na Taasisi nyingine za serikali kuwapa ushirikiano wa kutosha ili waweze kufanikiwa kuwekeza nchini.
“Nawashukuru sana AFASU, nawakaribisha sana na ninawaomba watanzania tuendelee kuwapa ushirikiano wote pale ambapo wataitaji vibali, ardhi, na idhini mbalimbali za serikali ili waweze kutekeleza mradi wao tutahakikisha kwamba tunasimamia hilo kwahiyo tusingependa kuwakwamisha kwa sababu hii inatupa sifa sisi na inampa pia amani Mhe. Rais na kuendelea kujenga imani kubwa kwa wawekezaji wa ndani na nje ya nchi
Kwa upande wake Rais wa Jumuiya hiyo, Dkt. Hossam Darwish amesema Jumuiya ya AFASU wako tayari kutekeleza vipengele vyote ambavyo vimo ndani ya makubaliano hayo na watatekeleza kwa nguvu kubwa na haswa kwa kuanza na sekta ya kilimo ambapo ndani ya Jumuiya wanao wajumbe ambao ni wawekezaji wakubwa kwenye sekta ya kilimo ambapo wameona maeneo ya kilimo na wamevutiwa sana na fursa hiyo ya kilimo hapa nchini na hivyo wanatoa ishara njema kwamba wao watakuwa ni sehemu ya uwekezaji katika sekta hii ya kilimo pamoja na sekta nyingine ambazo zitakuwa zimeainishwa katika makubaliano.
Dkt. Hossam ameongeza kuwa kwa hatua ya kwanza na kwa haraka wataanza na mradi wa chuo cha Kimataifa cha Kitanzania cha mifumo ya kielektroniki ambacho kitakuwa na vitivo mbalimbali vya kimasomo ya kielimu na wanaimani kwamba vitivo hivyo vinaweza kwenda sambamba na kile walichokiona kinahitajika ndani ya nchi yetu ambapo shahada mbalimbali zitatolewa kupitia chuo hicho na kitaweza kuchukua wanafunzi kutoka sehemu mbalimbali za Afrika nakuhakikisha kuwa mfumo wa masomo utaweza kutoa wataalamu wa kutosha.
Amesema hatua nyingine itakayofuata ni mradi wa maonyesho ya biashara ambayo yatafanyika hapa nchini Tanzania ili kuweza kuchochea uwekezaji na pia jumuiya hiyo itajikita katika uwekezaji wa masuala ya utalii hususan katika ujenzi wa hoteli zenye hadhi kubwa na katika sekta ya afya watajikita katika ujenzi wa viwanda vya kuzalisha Dawa na vifaa Tiba .
Kwa upande mwingine Dkt. Hossam amemshukuru Waziri wa Uwekezaji kwa kuonesha uzalendo mkubwa kwa nchi yake ambapo amekuwa na juhudi kubwa sana na kwa upande wake anamatumaini makubwa kuwa Tanzania itapiga hatua katika sekta hii ya uwekezaji kwa juhudi kubwa ambazo anazifanya Waziri wa Uwekezaji.
