Home Mchanganyiko NAIBU WAZIRI WA FEDHA NA MIPANGO AUAGIZA UONGOZI WA WILAYA YA ILEMELA...

NAIBU WAZIRI WA FEDHA NA MIPANGO AUAGIZA UONGOZI WA WILAYA YA ILEMELA KUHAKIKISHA HOSPITALI MPYA YA WILAYA INATOA HUDUMA KIKAMILIFU

0

Naibu Waziri wa Fedha na Mipango, Mhe. Mwanaidi Ali Khamis (Mb) akitoa maagizo kwa Mkuu wa Wilaya ya Ilemela Dkt. Severine Lalika (hayupo pichani), kuhakikisha Hospitali mpya ya Wilaya ya Ilemela iliyopo eneo la Kabusungu, inawekwa vifaa tiba, umeme na maji haraka ili huduma za afya zianze kutolewa kwa wananchi kwa ufanisi. Kulia ni Mkurugenzi wa Manispaa ya Ilemela Bw. John Wanga.

Mganga Mkuu wa Manispaa ya Ilemela, Dkt. Charles Samson, akimuongoza Naibu Waziri wa Fedha na Mipango, Mhe. Mwanaidi Ali Khamis (Mb) (katikati), kukagua miundombinu ya Hospitali mpya ya Wilaya ya Ilemela iliyopo eneo la Kabusungu, wakati wa ziara yake ya kukagua miradi ya kimkakati iliyopo jijini Mwanza.

Mkuu wa Wilaya ya Ilemela, Dkt. Severine Lalika, akimuahidi Naibu Waziri wa Fedha na Mipango, Mhe. Mwanaidi Ali Khamis (Mb) (hayupo pichani), kutekeleza maagizo yote aliyoyatoa kwa wakati likiwemo suala la upatikanaji wa vifaa tiba, umeme na maji katika Hospitali mpya ya Wilaya ya Ilemela iliyopo eneo la Kabusungu.

Baadhi ya maafisa walioongozana na Naibu Waziri wa Fedha na Mipango, Mhe. Mwanaidi Ali Khamis (Mb) (hayupo pichani), wakiwa katika  kikao cha majumuisho baada ya Naibu Waziri huyo kukagua miradi ya Hospitali ya Wilaya ya Ilemela, Kituo cha mabasi na maegesho ya maroli,  katika Wilaya ya Ilemela, jijini Mwanza.

Naibu Waziri wa Fedha na Mipango, Mhe. Mwanaidi Ali Khamis (Mb) (wa pili kulia), Naibu Waziri wa Ardhi, Nyumba na Maendeleo ya Makazi, Mhe. Dkt. Angelina Mabula (kulia), wakiwa katika picha ya pamoja na Mkuu wa Wilaya ya Ilemela, Dkt. Severine Lalika na Mkurugenzi wa Halmashauri ya Manispaa Ilemela, Bw.  John Wanga, baada ya kuhitimisha ukaguzi wa miradi ya kimkakati jijini Mwanza.

Naibu Waziri wa Fedha na Mipango, Mhe. Mwanaidi Ali Khamis (Mb) (kulia), akisikiliza taarifa ya maendeleo ya mradi wa  ujenzi wa kituo cha mabasi na maegesho ya malori Nyamhongolo, jijini Mwanza, kutoka kwa Mkurugenzi wa Halmashauri ya Manispaa ya Ilemela, Bw.  John Wanga, wakati wa ziara yake ya kukagua miradi ya kimakakati inayofadhiliwa na Serikali,  jijini humo.

Muonekano wa moja ya jengo lililopo katika mradi wa kituo cha mabasi na maegesho ya malori Nyamhongolo-jijini Mwanza, ambapo mradi huo umekamilika kwa asilimia 60.

Mhandisi Mshauri wa mradi wa  ujenzi wa kituo cha mabasi na maegesho ya malori Nyamhongoro jijini Mwanza, Sylester Ngowi, akimuongoza Naibu Waziri wa Fedha na Mipango, Mhe. Mwanaidi Ali Khamis (Mb) (wa pili kulia), kukagua mradi huo.

Muonekano wa moja ya jengo la Hospitali mpya ya Wilaya ya Ilemela iliyopo eneo la Kabusungu ambayo imekamilika na imeanza kutoa huduma licha ya changamoto ya vifaa tiba ambavyo mchakato wake wa manunuzi unaendelea na unaweza kuchukua miezi sita tangu sasa kuweza kupatikana.

(Picha na Farida Ramadhani, WFM, Mwanza)

*********************************************

Na. Farida Ramadhani na Peter Haule, WFM, Mwanza

Naibu Waziri wa Fedha na Mipango, Mheshimiwa Mwanaidi Ali Khamis, amemuagiza Mkuu wa Wilaya ya Ilemela kuhakikisha vifaa tiba, umeme na maji vinapatikana kwa haraka katika Hospitali mpya ya Wilaya hiyo iliyojengwa katika eneo la Kabusungu  ili huduma za afya zianze kutolewa kwa wananchi kwa ufanisi.

Amelitoa agizo hilo baada ya kukagua ujenzi wa hospitali hiyo pamoja na mradi wa Stendi ya Mabasi na Maegesho ya Malori kinachojengwa eneo la Nyamhongolo inayotekelezwa na Halmashauri ya Manispaa ya Ilemela, Jijini Mwanza kwa ufadhili wa Serikali Kuu.

Mheshimiwa Mwanaidi Ali Khamis ametoa maagizo hayo baada ya Uongozi wa Wilaya ya Ilemela kumweleza kuwa majengo muhimu ya hospitali hiyo yamekamilika lakini hospitali haijaanza kutoa huduma kikamilifu kutokana na kutopelekwa vifaa tiba pamoja na ukosefu wa umeme na maji katika eneo la mradi.

 “Serikali imetoa fedha nyingi kiasi cha shilingi bilioni 1.8 kwa ajili ya kufanikisha ujenzi wa Hospitali hiyo hivyo haiwezekani ikabaki bila maji na umeme kwa kuwa ni muhimu katika uendeshaji wa Hospitali, lakini nawapongeza kwa ujenzi madhubuti wa hospitali, majengo ni mazuri na imara”, alisema Mhe. Mwanaidi Ali Khamis

Aliwataka watumishi wa Hospitali hiyo ambayo imeanza kutoa baadhi ya huduma kuhakikisha wanafanya kazi kwa bidii, uzalendo na kutunza vifaa na miundombinu iliyopo ili lengo la Serikali la kujenga hospitali hiyo na kuwapa wananchi huduma bora za afya liweze kutekelezwa kikamilifu.

Mchumi wa Manispaa ya Ilemela Bw. Mophen Mwakajonga, alisema kuwa majengo saba ya hospitali hiyo yaliyokamilika ni pamoja na jengo la wazazi, jengo la wagonjwa wa nje, utawala, maabara, mionzi na stoo ya dawa.

Alisema kuwa utekelezaji wa mradi huo umegharimu kiasi cha shilingi bilioni 1.8 ambapo shilingi bilioni 1.7 zilitolewa na Serikali Kuu na shilingi milioni 176 zinatokana na mapato ya ndani ambazo zimetumika kufidia eneo la mradi na  kiasi cha shilingi milioni 304 zimetumika katika ujenzi wa ukuta wenye urefu kilomita 1.41 kuzunguka hospitali hiyo.

Katika hatua nyingine, akizungumza baada ya kukagua mradi wa ujenzi wa kituo cha mabasi na maegesho ya malori-Nyamhongolo, Naibu Waziri wa Fedha na Mipango amemuagiza Mkandarasi  wa mradi huo kampuni ya Stecol Corporation kutoka nchini China, kuongeza kasi ya ujenzi wa mradi huo ili uanze kufanyakazi kwa lengo la kuongeza mapato ya Manispaa na kukuza ajira kwa wananchi.

Alisema kuwa baada ya kukagua mradi huo amebaini kuwa haujakamilika kwa asilimia 65 kama watalaam walivyomweleza kwa sababu hata mafundi waliopo ni wachache na kuonesha wasiwasi wake kama mradi huo utakamilika mwezi Mei mwaka 2021 (mwaka huu) kama ilivyopangwa kwa mujibu wa mkataba.

Awali akitoa maelezo ya ujenzi wa Mradi huo wa Kituo cha Mabasi na maegesho ya Malori, Mkurugenzi wa Manispaa ya Ilemela Bw. John Wanga, alisema kuwa mradi huo utakaogharimu shilingi bilioni 28 umekamilika kwa asilimia 65 ambapo ukikamilika utakuwa na uwezo wa kuhudumia mabasi 120  na kuegesha malori 100 kwa wakati mmoja.

Alisema kuwa mradi huo ukikamilika utachangia kuongeza mapato ya halmashauri, utachochea uchumi wa wananchi kwa kuzalisha ajira, pamoja na kubadilisha sura na mwonekano wa Halmashauri ya Manispaa ya Ilemela.

Kwa upande wake Mkuu wa Wilaya ya Ilemela, Dkt. Severine Lalika alimshukuru Naibu Waziri wa Fedha na Mipango, Mhe. Mwanaidi Ali Khamis kwa  kutembelea miradi hiyo na kuahidi kutekeleza maagizo yake yote ili miradi hiyo ikamilike kwa wakati na kutoa huduma kwa wananchi kwa kuongeza mapato ya Serikali na kuboresha huduma za afya.

Serikali kupitia Wizara ya Fdha na Mipango imetoa zaidi ya shilingi bilioni 288 kwa ajili ya kutekeleza miradi ya kimkakati kwenye halmashauri 29 nchini, yenye lengo la kuziwezesha halmashauri kujitegemea kimapato na kupunguza utegemezi kutoka Serikali Kuu.