Home Mchanganyiko MBUNGE BUPE AITAKA SERIKALI KUJENGA VISIMA VIREFU VYA MAJI NKASI

MBUNGE BUPE AITAKA SERIKALI KUJENGA VISIMA VIREFU VYA MAJI NKASI

0

Mbunge wa Viti Maalumu, Bupe Mwakang’ata (CCM), Mkoa wa Rukwa, akiuliza swali kwa Waziri wa Maji bungeni Dodoma kwamba  Je, Serikali ina mpango gani wa kujenga visima virefu vya maji katika Wilaya ya Nkasi ili kutatua changamoto ya maji iliyopo

………………………………………………………………………………………….

Na.Alex Sonna,Dodoma

Mbunge wa Viti Maalum Mhe.Bupe Mwakang’ata,amehoji Serikali ina mpango gani wa kujenga visima virefu vya maji katika wilaya ya Nkasi ili kutatua changamoto ya maji iliyopo.

Akiuliza swali bungeni leo,Mhe.Bupe amesema ”Je, Serikali ina mpango gani wa kujenga visima virefu vya maji katika Wilaya ya Nkasi ili kutatua changamoto ya maji iliyopo”amehoji

Akijibu swali hilo  Naibu Waziri wa Maji Jumaa Aweso amesema kuwa kwa kutambua tatizo la maji lililopo katika Wilaya ya Nkasi Serikali katika mwaka wa fedha 2019/2020 imepanga kuchimba visima virefu 9 katika maeneo ya Masolo, Katogolo, Mpata, Mienge, Itindi, Kacheche, Lyele, Mbwendi na Kakoma.

Aidha Aweso amesema kuwa  kiasi cha Shilingi Milioni 315 kimetengwa katika bajeti ya mwaka 2019/2020 kwa ajili ya kazi hiyo.

“ Hadi kufikia mwezi Disemba 2019, Visima 7 vimechimbwa katika vijiji vya Masolo, Katogolo, Mpata, Mienge, Kanazi na Ipanda na kiasi cha Shilingi Milioni 220 kimetumika katika upimaji na uchimbaji wa visima hivyo ambavyo vitatumika kama vyanzo vya maji katika vijiji husika”amesema Mhe.Aweso

Hata hivyo amesema  kuwa katika mpango wa muda mrefu wa kutatua tatizo la maji katika Wilaya ya Nkasi, katika mwaka wa fedha 2019/2020, Serikali imepanga kutumia zaidi ya Shilingi Bilioni 1.3 kwa kupitia Programu ya PforR kwa ajili ya kuboresha huduma ya maji katika Wilaya ya Nkasi.

“Wizara imeshatuma fedha hizo kwa ajili ya utekelezaji wa miradi ya maji 6 Wilayani Nkasi ambapo miradi yote hiyo itatekelezwa kwa mfumo wa Wataalam wa ndani (Force Account)”amesisitiza