Home Mchanganyiko DK. BASHIRU: NI MARUFUKU WAJUMBE WA MASHINA (MABALOZI) KUKAA FOLENI KATIKA OFISI...

DK. BASHIRU: NI MARUFUKU WAJUMBE WA MASHINA (MABALOZI) KUKAA FOLENI KATIKA OFISI ZOTE ZA SERIKALI NA CHAMA

0

Katika muendelezo wa ziara yake Mkoani Mwanza, leo Katibu Mkuu wa CCM Dk. Bashiru Ally amefika wilayani Magu, ambapo katika vikao vitatu tofauti amesisitiza mabalozi nchi nzima kutokupanga foleni katika ofisi yeyote ya Serikali ama ya CCM.

Akiambatana na viongozi wa chama na serikali wakiongozwa na Mwenyekiti wa CCM mkoa wa Mwanza Ndg. Anthony Diallo, Katibu Mkuu amekutana na wanachama, mabalozi, na wajumbe wa halmashauri kuu za kata zote na matawi yote wilayani Magu katika vikao vitatu tofauti.

Katibu Mkuu ameeleza kuwa, mabalozi nchi nzima hawatakiwi kukaa foleni katika ofisi yoyote ya serikali na chama, kuanzia ofisi za watendaji wa mitaa, watendaji wa kata, wakuu wilaya, wakurugenzi, wakuu wa mikoa mpaka ofisi za wizara yoyote nchini, kwa sababu mabalozi ndio watu wanaofanya kazi kuliko kiongozi yeyote, kwa kuhangaika na changamoto za mwananchi mmoja mmoja katika eneo lake, bila ya mshahara na wanajitolea wakati wote.

“Nitoe rai kwa niaba ya Chama Cha Mapinduzi nchi nzima kwa viongozi wa serikali na Chama, wakuu wilaya na mikoa, wakurugenzi wote wa Halmashauri nchi nzima, makatibu wa wilaya na mikoa nchi nzima, hawa viongozi wetu wajumbe wa mashina ni marufuku kukaa foleni kwenye ofisi zenu, hawa ni viongozi na wamebeba watu nyuma yao, wanapokuja ofisini wanakuja kueleza hisia, changamoto, na ushauri wa watu wao wanaowaongoza. Kiongozi yeyote atakaye wadharau mabalozi wetu huyo hatufai ndani ya Chama na serikali hii ya CCM.” Dk. Bashiru amesisitiza.

“Wajumbe wa mashina ni watu muhimu sana na wamekuwa wakifanya kazi hizi ngumu kwa uzalendo wao pasipo malipo ya mshahara, wanajitoa wakati wote kusaidia watu, wanajua changamoto za mwananchi mmoja mmoja na wakati mwingine hawalali kwa ajili ya shida za watu wanaowaongoza, wanafanya yote haya kwa kujitolea na uzalendo kwa nchi yetu, sitaki nisikie wanawekwa foleni katika ofisi yoyote ya umma, hata ofisini kwangu nikisikia balozi amekuja kutaka kuongea na mimi ni lazima nimpe kipaumbele kwa sababu najua hawa ndio wanaishi na watu.” Katibu Mkuu amefafanua.

Katika vikao hivo Dk. Bashiru amepata fursa ya kusikiliza kero za wananchi, ambapo wananchi wameonesha kuwa na hamu kubwa ya kusikilizwa kero zao za muda mrefu na kutopata wasaa wa kukutana na viongozo wa maeneo yao, kuelezwa na kufafanuliwa mambo mbalimbali yanayohusi changamoto zao.

Katika hatua hiyo Dk. Bashiru ameendelea kukazia maelekezo ya Mh. Rais John Pombe Magufuli kuwataka viongozi wote kuanzia ngazi za msingi mpaka taifa kutenga muda katika maeneo yao kuwa karibu na wananchi, kuwasikiliza kero zao, na kuwapatia ufafanua kwa kuzingatia hali halisi kama afanyavyo Rais mara kwa mara apatapo muda ofisini au akiwa ziarani, kama alivyofanya kwa wachimbaji wadogo, wafanyabiashara n.k.

“Kila mmoja katika eneo lake la uongozi asikilize watu, atoe ufafanuzi juu ya masuala yanayowatatiza wananchi, awe karibu na wananchi. Hatuwezi kumuachia Mh. Rais aendeshe nchi hii peke yake wakati ametupatia mamlaka ya kutenda na kusaidia watu.” Katibu Mkuu amesisitiza.

Akiwa wilayani Magu Katibu Mkuu ameweka jiwe la msingi la na kushiriki ujenzi wa Hosteli za CCM na kukagua mradi wa Umoja wa Wanawake wa Tanzania (UWT) wa ufugaji wa ng’ombe wa maziwa ambapo amewaongezea ng’ombe mmoja ili kuimarisha mradi utakao wezeshe shughuli za Chama na Jumuiya.

Ziara ya leo wilayani Magu ni muendelezo wa kutekeleza jukumu la viongozi wa CCM kufuatilia utekelezaji wa maelekezo ya Halmashauri Kuu ya Taifa ya CCM.