SERIKALI YATANGAZA MIKAKATI 8 KUVUTIA UWEKEZAJI, KUONGEZA AJIRA KWA VIJANA

Waziri wa Nchi, Ofisi ya Rais – Mipango na Uwekezaji, Prof. Kitila Mkumbo ametangaza mikakati mahsusi nane ya serikali yenye lengo la kuongeza uwekezaji na kupanua fursa za ajira kwa vijana nchini.

Akizungumza wakati wa uzinduzi wa Bodi ya Wakurugenzi ya Mamlaka ya Uwekezaji na Maeneo Maalum ya Kiuchumi Tanzania (TISEZA) pamoja na kongamano la uwekezaji jijini Dar es Salaam, Prof. Kitila alisema serikali imejipanga kuweka mifumo na programu maalum za kuwawezesha vijana kushiriki kikamilifu katika sekta ya uwekezaji.

Amesema miongoni mwa hatua hizo ni kuanzishwa kwa Kituo Maalum cha Kuhudumia na Kuwezesha Wawekezaji Vijana (Youth Investors Resource Centre) kitakachotoa mafunzo na huduma za uwezeshaji. Kituo hicho kitakuwa Mabibo jijini Dar es Salaam na kitakuwa na uwakilishi katika ofisi za TISEZA mikoani.

Prof. Kitila alibainisha kuwa kituo hicho kinatarajiwa kuzinduliwa kabla ya mwisho wa mwaka huu, sambamba na programu maalum ya kuwawezesha vijana kuanzisha uwekezaji wa viwanda katika maeneo mbalimbali yaliyotengwa mahsusi nchini.

Aidha Profesa Kitila Mkumbo amesema Dira ya Taifa ya Maendeleo 2050 imebainisha vigezo vitano muhimu vitakavyotumika katika kuchagua sekta za kimageuzi, hasa kwa ajili ya kuchochea kipato na kuongeza ajira kwa vijana.

vigezo hivyo ni uwezo wa sekta kuzalisha ajira kwa wingi, hususan kwa vijana, uwezo wa kuongeza mauzo ya bidhaa nje ya nchi (export potential), nafasi ya sekta katika kukua na kuchochea ukuaji wa sekta nyingine, nafasi ya sekta katika kuongeza thamani (value addition) na fursa ya sekta katika kukuza mapato ya Serikali.

Katika hatua nyingine, serikali imetenga maeneo kwa ajili ya uwekezaji wa vijana wakiwemo wahitimu wa vyuo vikuu na vyuo vya ufundi. Maeneo hayo ni Dodoma (Nala, ekari 100), Pwani (Kwala, ekari 20), Mara (Bunda, ekari 100), Ruvuma (Songea, ekari 100) na Bagamoyo (ekari 20).

Ameongeza kuwa programu hiyo itahusisha mafunzo, upatikanaji wa ardhi, uunganishwaji na wazalishaji wa mitambo na malighafi, pamoja na kuwaunganisha vijana na benki washirika kama Azania Bank, TCB na CRDB.

Aidha, serikali imepanga kusogeza huduma za TISEZA katika kila mkoa ifikapo mwaka 2028, ambapo kutakuwa na kituo maalum cha kutangaza na kuwezesha uwekezaji kwa kushirikiana na TAMISEMI.