Mkuu wa wilaya ya Sumbawanga Nyakia Ally Chirukile wakati akizungumza katika kongamano kubwa la amani na utulivu mjini Sumbawanga.
Baadhi ya wananchi waliojitokeza katika kongamano kubwa la amani na utulivu mjini Sumbawanga
……………..
Na Neema Mtuka Sumbawanga
Rukwa:Mkuu wa Wilaya ya Sumbawanga Nyakia Ally Chirukile ameongoza kongamano kubwa la amani na utulivu katika Ukumbi wa Nazareth, Halmashauri ya Manispaa ya Sumbawanga Mkoani Rukwa likihusisha makundi mbalimbali ya kijamii kutoka maeneo tofauti ya Wilaya ya Sumbawanga.
Kongamano hilo limewaleta pamoja Maafisa Usafirishaji (Bodaboda), Madereva Bajaji, Wamachinga, Mamantilie, Vikundi vya Wakulima na Wafugaji, Wajasiliamali pamoja na Vilabu vya Michezo likiwa na lengo la kuimarisha mshikamano, amani na ushirikiano ndani ya Wilaya na Taifa kwa ujumla.
Akizungumza katika Kongamano hilo, Chirukile amesema kongamano hilo ni uthibitisho kuwa Wananchi wa Sumbawanga wana dhamira ya dhati ya kudumisha utulivu, kuimarisha mahusiano na kufanya kazi kwa pamoja bila kujali tofauti za kijamii au kiuchumi.
Amesisitiza kuwa amani ndiyo nguzo muhimu ya maendeleo, hivyo kila Mwananchi ana wajibu wa kuilinda na kuithamini ili kuwezesha shughuli za kijamii na kiuchumi kuendelea bila changamoto zisizokuwa za lazima.
Aidha, katika hotuba yake, Chirukile amewakumbusha vijana, wafanyabiashara na makundi yote yaliyoshiriki kongamano hilo kuwa mabalozi wa amani katika Mitaa na Vitongoji vyao.
Amewataka kujiepusha na vitendo vya uchochezi, uvunjifu wa sheria na upotoshaji unaoweza kusababisha taharuki au kuvuruga utulivu wa Taifa.
Nao baadhi ya wananchi akiwemo Emanuel Mtafya amesema bado serikali ina kazi ya kufanya ili kuhakikisha inawainua vijana kijamii na kiuchumi.
“Serikali inatakiwa kuhakikisha kuwa inawapa kipaumbele vijana kwani ndio kundi kubwa ambalo halina ajira na kuishia mitaani”amesema Mtafya.
DC Nyakia amesema kuwa serikali itazidi kushirikiana kwa karibu na jamii ili kuhakikisha mazingira salama yanaendelea kuimarika kwa manufaa ya wote.
“Serikali Ipo Kazini Kuhakikisha Usalama wa Raia na Mali Zao”amesema Nyakia
