Mwenyekiti wa Kamati ya Maandalizi ya mpango mkakati wa watu wa Taasisi ya Moyo Jakaya Kikwete (JKCI) ambaye pia ni Mkurugenzi wa Idara ya Tiba Shirikishi Dkt. Naizihijwa Majani akizungumza na wafanyakazi wa Taasisi wakati wa kikao cha kuwashirikisha wafanyakazi kuhusu mpango huo kilichofanyika leo katika ukumbi wa mikutano wa JKCI uliopo jijini Dar es Salaam.
Mkurugenzi wa Fedha na Katibu wa maandalizi ya mpango mkakati wa tatu wa Taasisi ya Moyo Jakaya Kikwete (JKCI) CPA. Agnes Kuhenga akizungumza na wafanyakazi wa Taasisi hiyo wakati wa kikao cha kuwashirikisha wafanyakazi kuhusu mpango huo kilichofanyika leo katika ukumbi wa mikutano wa JKCI uliopo jijini Dar es Salaam.
Baadhi ya wafanyakazi wa Taasisi ya Moyo Jakaya Kikwete (JKCI) wakifuatilia mada zilizokuwa zikitolewa katika kikao cha kuwashirikisha wafanyakazi kuhusu maandalizi ya mpango mkakati wa tatu wa Taasisi hiyo leo jijini Dar es Salaam.Picha na JKCI
……………
Wafanyakazi wa Taasisi ya Moyo Jakaya Kikwete (JKCI) na Hospitali ya Dar Group wameshirikishwa kikamilifu katika maandalizi ya Mpango Mkakati wa Tatu wa Taasisi hiyo hatua inayolenga kuhakikisha mpango huo unazingatia mahitaji halisi ya watumishi na kuimarisha utoaji wa huduma bora kwa wananchi.
Ushirikishwaji huo umefanyika leo katika kikao cha pamoja cha wafanyakazi wote ambapo Kamati ya Maandalizi ya Mpango Mkakati wa Tatu iliwasilisha tathmini ya mpango uliopita na kueleza malengo mapya yanayotarajiwa kwenye mpango ujao.
Akizungumza katika kikao hicho, Mwenyekiti wa Kamati ya Maandalizi ambaye pia ni Mkurugenzi wa Idara ya Tiba Shirikishi Dkt. Naizihijwa Majani alisema wafanyakazi wameonyesha kufurahishwa na mafanikio ya mpango mkakati uliotangulia na kuahidi kutoa ushirikiano mkubwa katika kuboresha maeneo yanayohitaji kuimarishwa.
“Wafanyakazi wengi wanapenda kuona Mpango Mkakati wa Tatu ukijikita katika matumizi ya teknolojia, kuifanya JKCI kujitegemea zaidi na kuwafikia wananchi wengi kwa ufanisi mkubwa”, alisema Dkt. Naizihijwa.
Kwa upande wake Mtaalamu wa Tiba Mionzi wa JKCI Amani Materu aliishukuru Taasisi hiyo kwa kuwapa nafasi wafanyakazi kushiriki katika hatua za awali za uundaji wa mpango huo muhimu.
“Mpango huu utakuwa kielelezo cha mawazo ya wafanyakazi wote, unatupa nafasi kuona mahali tulipotoka, tulipo sasa na tunapokusudia kwenda”.
“Ushirikishwaji huu unarahisisha safari ya kufikia malengo yetu. Tutaendelea kutoa maoni na mchango wetu ili kuijenga Taasisi yetu”, alisema Materu.
Naye Mfamasia wa JKCI Ndenashe Kimaro alisema wafanyakazi wamefarijika kuona wamepewa jukwaa la kutoa maoni na kuwa sehemu ya uundaji wa mwelekeo mpya wa taasisi.
“Tutajitahidi kwa pamoja kuhakikisha taasisi yetu inaendelea kung’ara na kuwa mfano wa kuigwa Afrika Mashariki na Kati katika utoaji wa huduma za kibingwa za magonjwa ya moyo”, alisema Ndenashe.
Wakizungumza kwa nyakati tofauti wafanyakazi wa Taasisi hiyo tawi la Hospitali ya Dar Group waliuomba uongozi kutoa mafunzo zaidi kwa wafanyakazi wa tawi hilo ili waweze kufahamu zaidi kwani wameingia katika utumishi wa umma hivi karibuni hivyo bado baadhi ya vitu hawavifahamu.
Daktari wa Hospitali ya JKCI Dar Group Phocus Kibira alisema mpango mkakati uliopita wafanyakazi hao hawakuwa sehemu ya JKCI hivyo maandalizi ya mpango huu wanahitaji mafunzo na ushirikishwaji wa kutosha ili nao waweze kufahamu na kuwa sehemu ya maandalizi ya mpango huo.
Rehema Stephano ambayo ni Mhasibu ya Hospitali ya JKCI Dar Group alisema kikao cha leo kimewatambulisha uwepo wa mpango mkakati wa Taasisi lakini mambo hayo kwao bado ni mageni hivyo kuomba kupata mafunzo maalumu yatawasaidia kupata mwangaza.
Mpango Mkakati wa Tatu wa JKCI unatarajiwa kukamilika mwezi Machi 2026 na kuanza kutumika rasmi katika mwaka wa fedha 2026/2027.
